سألت نفسك قبل كده الدهب اللى موجود على الأرض وصل للأرض ازاى؟! وسؤال تانى هو الدهب أساساً اتكون ازاى؟!
اتعودنا نلاقى الدهب فى الصخور وعروق الكوارتز والمناجم، بس أصلاً العنصر ده اتصنع فى الطبيعة ازاى!! وخد بالك أن الدهب كـ عنصر طبيعى مش سهل، ده عدده الذرى 79 "يعنى نواة كل ذرة فيها 79 بروتون".
تخيل بقا أن درجة حرارة باطن الشمس اللى بتوصل لـ 15 مليون درجة مئوية متقدرش تصنع الدهب؟! ولا حتى انفجارات السوبر نوفا أو موت النجوم الضخمه اللى بينتج عنها حرارة بتوصل لـ 3 لـ 5 مليار درجة مئوية تقدر تصنع الدهب!
الدهب بيتصنع فى درجات حرارة 10 مليار كلفن على الأقل، وهنا السؤال؟! هو ايه المكان فى الكون أو الحالة الصعبة دى، اللى بينتج عنها مقدار حرارة يوصل لـ 10 مليار كلفن؟! وازاى بعد كده بتوصل للأرض!
بيتم صنع الدهب فى أعنف الإنفجارات الكونية.. انفجارات الكيلونوفا.. الإنفجار ده حالة كونية نادرة، وبيفسر برده ندرة عنصر الدهب فى الطبيعة..
ده ده امتا بيحصل؟! لما نجمين نيوترون يصطدموا ببعضهم. النجوم النيوترونية هى بقايا نجوم أكثر كتلة من شمسنا بـ 8 مرات على أقل تقدير، بعد انتهاء عمرها الافتراضى بتموت مسببة إنفجار سوبرنوفا وبيتبقى منها نواة "اللى هى النجم النيوترونى"
النجم النيوتروني قطره حوالي 20 كم بس، يعني في حجم القاهرة تقريبًا.. بس كتلته قد 1.4 إلى 3.4 مرة كتلة الشمس!
تخيل شمس كاملة مضغوطة في كورة صغيرة جدًا… مفيش حاجة في الكون أشد من الكثافة دي إلا الثقوب السوداء.
المجال المغناطيسي للنجوم النيوترونية مرعب! النجم النيوتروني ممكن يكون عنده أقوى مجال مغناطيسي معروف في الكون كله، فيه نوع منهم اسمه ماغنيتار (Magnetar) مجاله المغناطيسي أقوى من أي حاجة ممكن نتخيلها!.. أقوى من مجال الأرض بـ 1000 تريليون مرة! لدرجة انك لو وقفت على بُعد 1000 كم منه، المجال ده ممكن يجذب نسبة الحديد فى دمـ . ك بكل سهولة.
اغرب بقا معلومة واللى بنتكلم عنها هنا، ان صدماته بتصنع ذهب وبلاتينيوم ويورانيوم!
لما نجمين نيوترونيين يتصادموا، بيحصل انفجار اسمه كيلونوفا، وفي اللحظة دي، بيتكوّن العناصر الثقيلة اللي بنستخدمها على الأرض، زي الذهب والبلاتين واليورانيوم.
الذهب اللي اتكوّن في الانفجار ده، اتناثر في الفضاء على شكل غبار كوني، وبعد ملايين السنين، الغبار ده كان جزء من السحابة اللي كوّنت المجموعة الشمسية.. ومنها الأرض.
يعني ببساطة.. الذهب اللي في خاتمك هو بقايا انفجار كوني حصل من بلايين السنين على بعد آلاف السنين الضوئية مننا! من نجوم ماتت فى أعماق السماء.